I og F og eldri borgarar+öryrkjar.

 

Hvað eiga þessir framboðslistar sameiginlegt. Það er spurningin. Mér flaug það skyndilega í hug að það sem þessi framboð eiga öll sameiginlegt er að forystusauðirnir eru allir úr Sjálfstæðisflokknum! Margrét Sverrisdóttir (kannski Ómar Ragnarsson), Guðjón A. Kristinsson og Arndís Björnsdóttir eru öll úr Sjálfstæðisflokknum. Var einhver að tala um klofning einhversstaðar. Svo gæti verið von á einu enn, hver veit. Nei, ég segi nú bara svona. Er þá ekki augljóst hverjir mynda næstu ríkisstjórn. Jamm, Sjálfstæðisflokkarnir allir fjórir. Alveg er þetta grænt!

 

Seðlabankinn í pólitík?

Ingvi Hrafn skilur ekkert í Davíð, að leggja fram svona plagg eins og í gær. Hann grunar Seðlabankann kominn útí pólitíska refskák. Trúir því samt varla uppá Davíð vin sinn, en segir einhvern óþef af málinu. Hvort svo er skal ósagt látið en varla gat tímasetningin verið óheppilegri fyrir virkjunarsinna. Þá vitið þið það Sjálfstæðismenn. Davíð hefur talað! Flokkurinn telur komið nóg!

 

 

 

 

 

 

 

 

 

 

s

Alcan með kosningarétt í Hafnarfirði?

Ég verð að viðurkenna að hakan seig niður á bringu, þegar ég sá upphafið á borgarafundinum í Hafnarfirði í gær. Ég nefnilega hélt að "Hagur Hafnarfjarðar" og "Sól í Straumi" væru samtök borgaranna sem tækjust á um málefnið sem um átti að fjalla; viðfangsefnið væri sem sagt skipulagsmál og stækkunin hjá Alcan. En afsakið! Var ekki sjálft viðfangsefnið mætt, þ.e. fulltrúi þess í Straumsvík, Rannveig Hrist, afskið Rist, og hélt fyrstu framsöguræðuna. Síðan komu fulltrúar samtaka borgaranna. Ég er bara svona grænn, en mér finnst eitthvað nú bogið við þetta...

Íran; innrás yfirvofandi?

Álver, kreppusótt og voðaskot.

Stóriðjusinnar eru illa haldnir af kreppusótt! Þeir halda því stíft fram og tönglast á því í síbylju, að hér skelli á kreppa, verði ekki af stækkuninni í Straumsvík og öðrum stóriðjuframkvæmdum. Helsta baráttuaðferð þeirra er sem sagt hræðsluáróður og svo að stoppsinnum sé illa við launþega. Ja, hérna hér. Athyglisvert er að í áróðri sínum skírskota þeir fyrst og fremst til tilfinninganna. Þeir beita í raun engum rökum öðrum en tilfinningalegum. Hagvaxtarspár og önnur efnahagsleg rök, ástand umhverfis, framtíðarhorfur í þróun atvinnulífsins og möguleikar í nýjum tækifærum. Allt þetta er víðsfjarri í huga þeirra og málflutning. Þær skorður sem við myndum setja okkur í framtíðinni með áframhaldandi stóriðjuframkvæmdum eru líka fjarri huga þeirra og málflutningi. Greiningardeild Glitnis spáir 2,6-3,5% hagvexti næstu 3 árin án frekari stóriðjuframkvæmda. Spáin segir líka, að áframhaldandi stóriðjuframkvæmdir sé ávísun á áframhaldandi þenslu og auki líkurnar á harðri lendingu í hagkerfinu. Þetta er það sem Seðlabankinn segir líka (sumir virðast ekki átta sig á því að Davíð er bara að kynna afrakstur vinnu fjölda sérfræðinga í efnahagsmálum, heldur hnýta í kallinn).  Verði framhald á stóriðjuframkvæmdum mun það leiða til áframhaldandi hárrar verðbólgu (5-8%), hárra vaxta, áframhaldandi mikils viðskiptahalla og gengissveiflna. Hvað þýðir það? Það þýðir: lakari lífskjör venjulegra launþega og lífeyrisþega, þyngri greiðslubyrði af öllu vísitölutryggðum lánum s.s. húsnæðislánum og sú greiðslubyrði lækkar ekki aftur, kaupgeta mun minnka (eitt einkenni verðbólgu), erfiðari rekstrarskilyrði í iðnaði, sjávarútvegi og ferðaþjónustu. Fyrirtækjum eins og Marel, Össuri, Actavis, hugbúnaðarfyrirtækjum og slíkum mun blæða og færri tækifæri á sviði þekkingariðnaðar munu verða nýtt.  Fjármálageirinn mun hinsvegar blómstra sem aldrei fyrr, sem sagt græðir áfram á vitleysunni. Viðskipahallann þarf að vinna upp, sem þýðir lakari lífskjör. Mengunarkvótinn verður fullnýttur og þar með skerðast möguleikar okkar til framtíðar. Hagkvæmustu virkjunarkostirnir verða nýttir til stóriðju og skerðir það með möguleika okkar. Má þar nefna stórrekstur á sviði upplýsingaiðnaðar, t.d. flutningur Google og slíkra fyrirtækja til landsins og uppbygging slíkra fyrirtækja innanlands. Slík fyrirtæki eru að leita sér að hagkvæmri orku ekki síður en málmiðaður. Og þau sækja í umhverfisvæna orku vegna ímyndar sinnar. Vetnisframleiðslu, framleiðslu rafmagns til samgangna o.fl. slíkt má nefna. Áframhaldandi stóriðjuframkvæmdir reisa okkur skorður vegna umhverfismála og í orkuframleiðslu fyrir annað. Álverið í Straumsvík er ekkert að fara, þó ekki verði stækkað. Raforkusamningar eru til 6 ára enn og Alcan skilur ekki við sig fjárfestingar sem skila hagnaði. Stöðugt mun þrengja að áliðnaðinum í framtíðinni vegna hækkunar á orkuverði um allan heim og vegna umhverfisverndar. 2012 verða settir nýjir mengunarkvótar og þrengri reglur í umhverfismálum í heiminum eru fyrirsjáanlegar. Með tilliti til efnahagsspáa greiningadeilda bankanna og Seðlabankans og horfanna í umhverfismálum heimsins má segja að áframhaldandi stóriðjuframkvæmdir myndu teljast til voðaskota í efnahagslegu og umhverfislegu tilliti. Það er mín skoðun!

Heimilisiðnaður og ljósmyndaalbúm.

Ég sé að Pétur Gunnarsson er farinn að blogga um heimilisiðnað og ljósmyndaalbúm. Gott mál! Batnandi mönnum er besta að lifa! Kannski við ættum að halda okkur við leistann okkar?

Og Ólafur Ragnar Grímsson, forseti lýðveldins.

Nýjasta viðbótin í merkri stjórnmálafræði bloggsins er, að ein og aðeins ein ástæða væri til þess að Vg og Helblái ákváðu að mynda ríkisstjórn fyrir kosningar: Að koma í veg fyrir  að forseti lýðveldisins færi að skipta sér að stjórnarmyndunarviðræðum! Merkilegri verða nú varla stjórnmálaskýringarnar. Höfundurinn er Róbert Trausti Árnason, fyrrverandi sendiráðunautur og "spæjó" Jóns Baldvins.

 

VinstriGræn og Íhaldið!

 

Nú eru bloggarar búnir að sanna það uppá VinstriGræn og íhaldið, að þessir flokkar eru búnir að mynda ríkisstjórn, sem tekur við eftir kosningar. Þessu til sönnunar vísa þeir til Guðmundar Ólafssonar hagfræings, Lobba, fyrrum vinstri-móguls og róttæklings. Guðmundur er núna hægri-krati í anda Jóns Sig. fyrrverandi ráðherra og bankastjóra Norræna Fjárfestingabankans. Guðmundur þessi er hinn sami og sagði, að þegar kæmi að efnahagsmálum samanstæði Samfylkingin af óvitum. Ekki veit ég,hvort Guðmundur er í Samfylkingunni...Já, ríkisstjórn er orðin til! VinstriGræn og helbláiflokkurinn! Sjálfsagt ganga þessir flokkar óbundnir til kosninga samt, ef sagan lýgur ekki. Steingrímur J. mun sverja þetta af Vg alveg fram á kosninganótt, en Geir Hilmar engu svara, en láta kjálkann síga örlítið. Þá vitum við það. Ég verð sí daprari eftir því sem ég hugsa lengur um þetta og veit eiginlega ekki lengur, hvar ég á að setja x-ið á kjörseðilinn. Ætli ég sitji bara ekki heima, eins og ég gerði í síðustu borgarstjórnarkosningum. Svo er Árni Þór ofarlega á lista Vg hér í R-norður, þannig það er kannski best að láta það alveg ógert að kjósa flokkinn sinn...Annars á það ekki að koma neinum á óvart að Vg lenti uppí hjá því helbláa á endanum. Steingrímur J. og Davíð voru búnir að láta eins og tvær Gay-Pride Drottningar á lausu í mörg ár, þegar sú síðarnefnda réðst inní Írak í sínu ástandsstandi og svo inní Seðlabankann...Það verður svo bara að koma í ljós, hvort VinstriGræn rýrna jafnmikið og visna milli rekkjuvoða íhaldsins og hin fyrri viðhöldin, Framsókn og Alþýðuflokkur...Ætli ég verði svo ekki að taka niður flokksmerkið á síðunni...

Pétur og heimildin (minnir á Önnu og útlitið)

Heimildarmaður Péturs Gunnarssonar er farinn að þynnast ansi mikið. Hafði semsagt sagt á bar að Geir og Steingrímur J. hefðu hist á fundi. Nú er fundurinn ekki lengur leynifundur, heldur e-r fundur og óvíst hverjir aðrir hafa verið staddir á fundinum eða hvort Geir og Steingrímur voru bara tveir. Heimildarmaðurinn tjáði sig í hópi blaðamanna, en ekki undir fjögur augu við Pétur eins og skilja mátti í upphafi. Heimildarmaðurinn taldi að stjórnarsamstarf hefði borist í tal. Ég held nú það, ég segi nú ekki meir. En mér er spurn: hversu mikið drukknir voru Pétur og heimildarmaðurinn? Mér er líka spurn: Var Pétur nokkuð staddur á sama bar og meintur heimildarmaður? Og: Hver tekur mark á drukknum manni? Ég vil minna á, að Pétur fullyrti upphaflega að Geir H. Haarde og Steingrímur J. hefðu hist á leynifundi útí bæ og hefðu farið fram stjórnarmyndunarviðræður á fundinum. Hafði Pétur þetta eftir traustum heimildarmanni sínum (væntanlega einkamoldvarpa Péturs innan Vg). Hversu traust eru nú svona vinnubrögð og hver er tilgangurinn?

Spilasalir hér, en ekki þar.

Ég bý hérna rétt ofan við Hlemm og er ekki í Sjálfstæðisflokknum og Villi Góði er ekki nágranni minn, þó svo hann eigi rætur að rekja hér í hverfinu. Foreldrar hans, ásamt fjölskyldu, þar með Villi litli, bjuggu í húsinu númer 9 við Einholt. Nú berast þær fréttir að spilavítið, sem nágrannar Villa og vinir hans í Flokknum ráku af höndum sér í Mjóddinni í Breiðholtinu, verði flutt niður á hornið á Rauðarárstíg og Laugavegi. Þar er fyrir svona spilavíti, sem fláð hefur peninga af spilafíklum í nokkur ár. Nú á sem sagt að bæta um betur, og stækka spilavítið sem nemur þessum ,sem flæmdur var úr Mjóddinni. Okkur íbúum svæðisins er ekki skemmt. Við viljum nefnilega, eins og íbúar Breiðholtsins, vera laus við ósómann. En í stað þess að flæma spilavítið burt fyrir okkur, ætlar Villi Góði, að breyta Hlemmi og nágrenni í eins konar mini-Vegas. Svona er lífið fyrir ofan Hlemm. Enda er ég, eins og ég segi, ekki í Flokknum og Villi Góði er ekki nágranni minn!

Pétur Gróuson á Leiti og Agnes Braga...

...hafa lengi talist meðal virtari blaðamanna og sjálfskipaðra álitsgjafa á Íslandi. Þau hafa nú bæði tekið að sér að hanna atburðarrásir sem aðeins eiga sér  stað í þeirra eigin höfði. Agnes tók "viðtal" við Jóhönnu Sig.. Sá galli er á viðtalinu að Jóhanna tók ekki þátt í því, það átti sér aðeins stað í höfðinu á Agnesi Braga. En Agnes gerir betur en þetta. Hún telur sig hafa betri heimildir um það sem á sér stað í þingflokki Samfylkingarinnar og á fundum Þingflokksins, en Össsur Skarphéðinsson, sem síðast þegar ég vissi var formaður þingflokksins. Geri aðrar blekbullur betur! Pétur er ekki síðri hönnuður á tilbúnum merkisviðburðum en Agnes. Hann hefur eftir heimildamanni sínum, að Geir H. Haarde og Steingrímur J. sitji leynifund og gerir því skóna að verið sé að semja um næstu ríkisstjórn. Enginn nema Pétur kannast við meintan leynifund, þannig að hann virðist hafa átt sér stað í höfðina á Pétri. Ekki veit ég hvort þessir blaðamenn og álitsgjafar eru svo veruleikafirrt, að þau álíti að það gildi einu hvort eitthvað hafi raunverulega gerst eða hafi aðeins átt sér stað í höfðinu á þeim í þeirra villtustu draumum um frábæra blaðamennsku og pólitíska greiningu. Okkur hin varðar það á hinn bóginn miklu, að blaðamenn haldi sig við veruleikann og raunverulega atburði. "Upplýsingar" um eitthvað annað eru okkur ekki til gagns. Hvað varðar  svokallaða heimildamenn, virðist það vera þannig að sumir blaðamenn skjóti sér á bak við þá til að firra sig ábyrgð á uppspuna sínum og hæpnum fullyrðingum. Svona eitthvað svipað og "ólyginn sagði mér" hjá skemmtilegum sögumönnum. Nema hvað Agnes og Pétur skemmta aðallega skrattanum, en skemmtilegir sögumenn áheyrendum sínum eða lesendum.

Karl Matt. á þing.

Var að lesa bloggara sem hafði tekið saman hverjir kæmust á þing  og hverjir féllu miðað við niðurstöður skoðanakönnunar. Þá rifjaðist upp fyrir mér saga frá þeim tíma þegar Karl Matthíasson komst fyrst á þing. Mörður Árnason komst ekki inn í þeim kosningum. Mörður hitti ónefndan skólafélaga sinn á gangi og tóku þeir tal saman. Eitthvað barst talið að þinginu og nýafstöðnum kosningum. Segir þá Mörður: Flestir eru nú komnir á þing. Átti hann þar við Kalla.---"Og komust færri að en vildu", svaraði þá skólafélaginn fyrrverandi.  

Fátækir...

Hlustaði á hádegisfréttir með öðru. Mér heyrðist haft eftir Sigurði T., að það væru fleiri en fátækir sem stunduðu fjársvik (Rétt skal vera rétt. Hann sagði: Það er ekki einvörðungu fátækt fólk, sem fremur auðgunarbrot). Ég trúi því varla að ég hafi heyrt rétt. Eða trúir Sigurður T. því í alvöru, að fátækir "stundi fjársvik". Vonandi þá ekki í stórum stíl, því þá væru þeir væntanlega ekki fátækir lengur eða hvað? Ef ég heyrði rétt, þá eru þessi orð Sigurðar T. sennilega það vitlausasta sem opinber embættismaður hefur látið útúr sér, held ég. Viðbót: Trúir saksóknari því, að það sé frekar fátækt fólk sem fremur auðgunarbrot? Þetta þykja sjálfsagt fréttir, en hvað hefur saksóknari fyrir sér í því?

Spilling á hæsta stigi

80 milljónir síðast, hvað nú...

Hvernig fer nú framsókn að í kosningabaráttunni? Mælast með innan við 10% fylgi. Hvernig eiga þeir að auglýsa sig upp í fylgi með 28 milljónum? Varla dugar  það þeim uppí 18% fylgi, eins og síðast. Falla nú vonir Framsóknarmanna  fagurlega til jarðar, eins og fiður af hænsnfoglum?

Auglýsingakostnaður stjórnmálaflokkanna takmarkaður við 28 milljónir

Lyftum asklokinu.---Alcan auglýsir.

Var að skoða auglýsingu Alcan. Minnti mig á umræðuna um Eyjafjörð versus Keilisnes umræðuna hér fyrir nokkrum árum. Þá var rifist um hvort setja ætti niður álver í Eyjafirði eða Keilisnesi. Ein röksemd Keilissinna var sú, að þar mengaði álver minna en í Eyjafirði. Mengunin fyki jú burt að mestu. Það er svo sem alveg rétt hjá Alcan að mengunin frá Straumsvík fer ekki beint ofaní nefið á Hafnfirðingum. En nákvæmlega, eins og mengunin hefði gert frá Keilisnesi, bitnar mengunin frá Straumsvík á okkur öllum Jarðarbúum á endanum, ekki bara á Hafnfirðingum og ekki bara á Íslendingum. Það er kannski til of mikils mælst, að fara fram á að Alcan lyfti asklokinu og líti til himins. En það má fara fram á það við Íslendinga. Reynum nú að skoða þetta mál í stærra samhengi. Við fáum ákv. mengunarkvóta, kvóta sem er hluti af heild. Mengunarkvótarnir verða endurskoðaðir 2012 (minnir mig) og þá er ekki sennilegt að þeir verði auknir, þvert á móti. Nú eru fleirri álrisar að banka uppá og vilja reisa verksmiðjur hér. Eitthvað er það á reiki hvað fyllir mengunarkvótann og hvenær. Viljum við setja okkur í þá stöðu að fylla mengunarkvótann með álverum eða viljum við eiga uppá eitthvað að hlaupa? Verslun með kvóta er hæpin lausn, enda um óvissu að ræða í því máli og ekki víst að um slíkt verði að ræða í framtíðinni, óvíst um verð og hver eigi að borga, hagkvæmni o.s.frv. Ætlum við sem sagt, að sitja uppi með það að vera búin að fylla okkar kvóta með mengun frá  álverum og geta okkur hvergi hrært í framtíðinni eða næstu 40 árin. Hvað ef eitthvað nýtt dæmi kæmi upp. Og ennfremur ætlum við okkur í skjóli eiginhagsmuna að vera meðal mestu umhverfissóða jarðarinnar og setja okkur og öðrum jarðarbúum skorður um vöxt í allri framtíð. Lyftum asklokinuog horfum til himins.

B-maðurinn

Bingi B?

Hverjum er nú ekki sama um svona pælingar? Nývaknaður eða rétt ósofnaður? Who cares? Hverskonar sjálfhverfa er þetta?

Stóriðjustopp og áfram hagvöxtur.Zero Framsókn!

Ýmsir hafa tjáð sig um afleiðingar stóriðjustopps á efnahagslífið. Kreppa-kreppa-kreppa heyrist frá stjórnar- og stóriðjusinnum. Greiningardeild Glitnis birti efnahagsspá í vikunni sem ekki gerir ráð fyrir frekari stóriðjuframkvæmdum. Hagvöxtur:  2006: 2.6%; 2007s: 1,7%; 2008s: 3,5%; 2009: 2,6%; 2010: 3,3%. Þess má geta að meðalhagvöxtur í ESB árið 2006 var 2.6%. Ekki er að sjá merki um samdráttur og kreppu í hagspánni.  Hinsvegar mætti segja mér, að möguleikar til að ná jafnvægi í hagkerfinu fælist í stóriðjustoppi. Einnig tækifæri til að byggja upp atvinnlíf þeirra landshluta, þar sem hagvöxtur hefur verið neikvæður undanfarin ár. Látum ekki þá flokka sem sjá þau tækifæri ein sem felast í stóriðju villa okkur sýn með hræðsluáróðri sínum. Stofnun og uppbygging lítilla og meðalstórra fyrirtækja er víðast hvar í heiminum vaxtarbroddurinn í hagkerfi landa, og skila meiru til þjóðfélagsins. Í stóriðjuþennslunni hverfa þessir möguleikar í skuggann og frumkvæði fólksins fær ekki þann stuðning sem þarf. Stóriðjustoppið býður því upp á þann mögileika að virkja hugvit og frumkvæði.

Kjósum um stefnumál flokkanna, Zero Framsókn!

Var að lesa nokkur Framsóknarmannablogg. Ósköp eitthvað erfitt hjá greyjunum. Íslandshreyfingin fer í taugarnar á þeim, jafnvel meira en Ingibjörg og Samfylkingin. Einn er farinn að renna hýru auga til formanns VinstriGrænna! Er það undarlegt, því einhver Framsóknar-Helga vill meina að hennar formaður sé mesti afburðarmaður sem gengur um á Íslandi í dag. Þannig að hróður Jóns og atgerfi er ekki öllum ljós í Framsóknarflokknum. Annars er leiðinlegt að sjá að Framsóknarbloggarar ætla að reka kosningabaráttu sína með óhróðri, skætingi og útúrsnúningi. Svona litla trú hafa þeir á málefnum sínum (ef einhver eru), eigin ágæti og reynslunni af stjórnmálagöngu sinni. VinstriGræn, Samfylkingin og Íslandshreyfingin eru öll í skotlínu Frammaranna. Þeir halla höfðinu ljúflega í kjöltu Íhaldsins, frelsara síns. Nú ætla þeir  í sameiningu, Villi góði (að eigin sögn) og Bingi, að bjarga ríkisstjórninni frá Sæbrautarklúðrinu. Faxaflóahafnir eiga að redda málinu. Meðan Framsókn sat í R-listaborgarstjórninni svelti ríkisstjórnin höfuðborgarsvæðið í vegamálum. Íhaldsherrarnir Sturla og Árni M. voru eins og staðir múlasnar gagnvart svæðinu. Fyrr skyldi frjósa í helvíti en þeir sýndu borgar og nágrannasveitarféögum samstarfvilja í vegamálum. Niðurstaðan er sú að flest banaslys í umferðinni verða á vegum sem liggja til og frá borginni. Nú lætur Ingi Björn sem Framsókn hafi ekki verið í R-listanum. Hann talar og skrifar, eins og þeir hafi ekki verið þar. Björn Ingi og Villi ætla að greiða úr fjármálaólestri og skuldasukki R-listans með því að sökkva borginni dýpra  í skuldafenið næstu 3 árin. Skuldir munu hækka um 40% per borgarbúa. Fara úr 971.000 í 1.364.000=393.000 hækkun. Eignir borgarinnar munu ekki vaxa sem þessu nemur, svo í hvað eiga þessir peningar að fara? Aftur að kosningarbaráttunni. Framsókn ætlar sér greinilega að hífa upp aumt fylgi sitt með auglýsingum auk þess sem að framan segir um kosningarbaráttu bloggara í Framsókn. Auglýsingamenn, spunameistaraog rægitungur er það sem þeir treysta á í baráttunni. Kannski geta sminkarar málað á Framsóknarmenn tímabundinn svip grandvarleika og stefnufestu. Seint held ég samt að til langframa fari af þeim spillingar- og hlaupatíkursvipurinn. Sem sagt, Zero Framsókn!

Björn Ingi, Hvaða skuldir?

Ætli geti verið að Björn Ingi hafi ekki lesið 3ja ára áætlunina? Skv. henni hækka skuldir borgarinnar pr. borgarbúa um 40,47%! Eru 2007 971.000, en verða 1.364.000 árið 2010; hækka semsagt um 393.000 á haus. Ber það vott um að greiða eigi skuldir borgarinnar?

Heildarskuldir A og B hluta borgarsjóðs hækka úr 113,963 milljörðum 2007 og fari í 166,094 milljarða 2010, hækka um 52 milljarða (skuldir án lífeyrisskuldbindinga). Ekki veit ég hvaða skuldir það eru  sem Björn Ingi segir að eigi að borga. Þær sjást ekki í þessari áætlun. Svo á víst að leggja áherslu á umhverfismál. Eitt er víst að fjárframlög til umhverfissviðs borgarinnar lækka til muna. Lenda í þessari meintu tiltekt á stjórnsýslu borgarinnar. Ætli sú tiltekt felist ekki í að setja vini og vandamenn niður við kjötkatkana; les: í vellaunaðar stöður í stjórnsýslu borgarinnar. Það fyndnasta við þessa áætlun er að þar er gert ráð fyrir að launakostnaður borgarinnar lækki næstu 3 árin. Hvernig það á að gerast hlýtur að flokkast undir galdra. Borgarbúum á að fjölga um 4300, byggja á nýja leikskóla og nýja grunnskóla. Eitthvað á þá að skeerast niður hlýtur að vera, en því miður þess sér ekki stað í áætluninni. Sem sagt: Hókus, pókus!