Við viljum utanþingsstjórn. Tengill á undirskriftir: http://utanthingsstjorn.is/

Við viljum utanþingsstjórn.

Ég skora á forseta Íslands að skipa utanþingsstjórn nú þegar.

Tengill til að skrifa undir: http://utanthingsstjorn.is/

Athugasemdir

[Axel Jóhann Hallgrímsson, 29.10.2010 kl. 18:19]

Það er undarlegt hve þessi utanþingsstjórnarómyndarhugmynd ætlar að vera lífseig. Slík stjórn er gersamlega gagnslaus hversu vel sem hún verður mönnuð og vel meinandi.  Slík stjórn fær engu áorkað án Alþingis, engin lög verða samþykkt án Alþingis. Geti meirihlutastjórn ekki komið hlutunum fram getur utanþingsómyndarstjórn það ekki, því þingið verður í stjórnarandstöðu í heild sinni, það segir sig sjálft.

[Auðun Gíslason, 29.10.2010 kl. 19:38]

Hér getur Axel kynnt sér hvað er hér á ferð, ef hann er tilbúinn til að opna hugann!  Ríkisstjórnin fer einsog köttur kringum heitan graut, þar sem  vandamál samfélagsins eru.  Kjarklaus og huglaus!  Hér ríkir stjórnarkreppa og þingið er í upplausnarástandi.  Engin forysta er fyrir hendi, sem þing og þjóð gæti fellt sig við.  Málin verður að leysa.  Það getur ekki ríkisstjórnin og ekki þingið með núverandi stjórn!  Valið stendur því milli neyðarstjórnar og kosninga.  Síðari kosturinn er raunar ekki kostur í stöðunni miðað við ástand stjórnmálaflokkanna.

Neyðarstjórn eða kosningar - yfirlýsing frá þingmönnum Hreyfingarinnar

Sú mesta efnahagsvá sem samfélaginu stafar hætta af í dag er skuldavandi íslenskra heimila.  Undanfarna viku hafa þingmenn Hreyfingarinnar tekið þátt í fjölda samráðsfunda með ráðherrum ríkisstjórnarinnar, öðrum þingmönnum og hagsmunaaðilum til að kanna hvort raunverulegur vilji sé til að leysa málin. Þrátt fyrir að fyrir liggi leiðir til lausnar sem gagnist mjög skuldugum heimilum án kostnaðar fyrir ríkissjóð og skattgreiðendur, er ríkisstjórnin ekki fær um að leysa úr málinu með sanngjörnum og réttlátum hætti. Ríkisstjórnin hefur nú endanlega sýnt að hún getur ekki stjórnað landinu með almannahag að leiðarljósi og hlýtur því að vera komin að leiðarlokum.

Vegna þeirrar alvarlegu stjórnarkreppu sem nú ríkir og útilokað er að Alþingi geti leyst,  leggja þingmenn Hreyfingarinnar fram eftirfarandi tillögur sem lúta að tímabundinni neyðarstjórn landsins (þingmanna og/eða utanþingsmanna) í stað núverandi ríkisstjórnar samkvæmt eftirfarandi forskrift.

1)      Forsætisráðherra skilar inn umboði sínu til forseta Íslands.
2)      Forseti Íslands kannar hvort þingmeirihluti sé fyrir því að verja slíka neyðarstjórn vantrausti verði henni komið á.
3)      Sé slíkur meirihluti ekki fyrir hendi verði boðað til Alþingiskosninga.
4)      Sé slíkur meirihluti fyrir hendi gerir forseti Íslands tillögu að neyðarstjórn. Tillaga forseta Íslands getur annað hvort falist í uppástungu að forsætisráðherra sem velji sér samráðherra eða tillögu að öllum ráðherrum slíkrar ríkisstjórnar.
5)      Þjóðaratkvæðagreiðsla fari fram um tillögu forseta Íslands að neyðarstjórn. Kosið verði um neyðarstjórnina í heild sinni. Verði henni hafnað verið boðað til Alþingiskosninga.
6)      Verði tillagan samþykkt starfar neyðarstjórnin þangað til stjórnlagaþing hefur lokið störfum og Alþingi afgreitt frumvarp um nýja stjórnarskrá. Að því loknu verði boðað til Alþingiskosninga.
7)      Neyðarstjórnin skal fá til liðs við sig færustu sérfræðinga. Í störfum sínum notist neyðarstjórnin við þjóðaratkvæðagreiðslur til að skera úr um brýn ágreiningsmál.

Verkefni neyðarstjórnar yrðu m.a.:
a)      Setning neyðarlaga til að leysa bráðavanda skuldsettra heimila sem taki m.a. mið af tillögum Hagsmunasamtaka heimilanna.
b)      Opinber lágmarks framfærsluviðmið.
c)      Fjárlög.
d)     Lýðræðisumbætur.
e)      Endurskoðun á samstarfi við Alþjóðagjaldeyrissjóðinn.

Eftirfarandi er svo tekstinn á síðunni http://utanthingsstjorn.is/

Áskorun

Alþingi nýtur ekki trausts nema 9% þjóðarinnar samkvæmt þjóðarpúlsi Gallup. Stjórn og stjórnarandstaða eru ráðþrota og gagnslaus. Þjóðstjórn kemur ekki til greina og alþingiskosningar eru tilgangslausar því stjórnmálaflokkar hafa mótað valdakerfið eftir eigin þörfum og vilja engu breyta.

Utanþingsstjórn er því eini raunhæfi möguleikinn í stöðunni. Í svipaðri stöðu, árið 1942 þegar síðast stóðu fyrir dyrum miklar stjórnarskrárbreytingar og ekki tókst að mynda starfhæfa ríkisstjórn, myndaði Sveinn Björnsson utanþingsstjórn til bráðabirgða. Við skorum á forsetann að skipa slíka stjórn áður en það ófremdarástand sem nú er uppi kallar yfir þjóðina enn alvarlegri afleiðingar.

Við undirrituð skorum á forseta Íslands að skipa landinu utanþingsstjórn sem tryggt verður að njóti stuðnings og samþykkis þjóðarinnar.

Utanþingsstjórnin skyldi svo fyrst og fremst einbeita sér að því að leysa brýnustu vandamál samfélagsins. Heimili landsins líða fyrir vanhæfi stjórnmálastéttarinnar og því ætti eftirfarandi að vera í forgangi:

• Það þarf að setja neyðarlög til að leysa bráðavanda skuldsettra heimila sem tekur mið af tillögum hagsmuna- og faghópa.
• Utanþingsstjórnin hefur auk þess það verkefni að vinna að skynsamlegum og raunhæfum langtímalausnum á skuldavanda heimilanna.
• Þar sem atvinnumissir er orðið stórt vandamál er það ekki síður brýnt verkefni utanþingsstjórnarinnar að vinna að uppbyggingu atvinnuveganna á skynsaman og raunhæfan hátt um allt land.
• Gagnger endurskoðun á efnahagsstefnu landsins. Þ.m.t. samstarfið við Alþjóðagjaldeyrissjóðinn.

Miða skal við að utanþingsstjórn hafi að lágmarki sex mánuði til að klára þessi verkefni en æskilegt væri að hún hafi lokið störfum er ný stjórnarskrá liggur fyrir enda verður þá boðað til kosninga út frá fyrirkomulagi nýrrar stjórnarskrár.

[Axel Jóhann Hallgrímsson, 30.10.2010 kl. 11:51]

Ég geri mér alveg grein fyrir vandamálunum. Þau hverfa ekki þó skipt verði um ríkisstjórn og og gildir þá einu hvað hún heitir og lausnirnar geta aldrei orðið annað en þær sömu, svona í stórum dráttum.

Til þess að þessir draumórar Hreyfingarinnar geti orðið þurfa þingmenn að viðurkenna og samþykkja að þeir séu liðleskjur og einskisnýtir til að stjórna landinu. Sérðu það gerast? Og verði kosið, koma þá frelsararnir í hópum inn á Alþingi með lausnirnar og hagana græna eins og gerðist í Reykjavík með innkomu Bestaflokksins?

Það er gaman að sjá, til stuðnings þessari hugmynd, vitnað í utanþingsstjórnina 1942. Því reynslan af þeirri stjórn ætti að vera mönnum næg ástæða til að vilja ekki slíkt getuleysisstjórnarform aftur. Sú stjórn var var aldrei annað starfsstjórn, sem sá aðeins um daglegan rekstur ríkisins, hún hafði aldrei afl eða stuðning þingsins til eins eða neins. Hún var skipuð vegna þess að þingmenn gátu ekki komið sér saman um myndun stjórnar og hékk sinn tíma vegna ósættis milli flokka á Alþingi. Þessu er ekki til að dreifa núna, því starfandi er meirihlutastjórn og 1942 var staða þjóðarbúsins allt önnur en í dag og því hægt var að lifa við utanþingsstjórnina tímabundið.

[Auðun Gíslason, 30.10.2010 kl. 17:47]

Utanþingsstjórnin skyldi svo fyrst og fremst einbeita sér að því að leysa brýnustu vandamál samfélagsins. Heimili landsins líða fyrir vanhæfi stjórnmálastéttarinnar og því ætti eftirfarandi að vera í forgangi:

• Það þarf að setja neyðarlög til að leysa bráðavanda skuldsettra heimila sem tekur mið af tillögum hagsmuna- og faghópa.
• Utanþingsstjórnin hefur auk þess það verkefni að vinna að skynsamlegum og raunhæfum langtímalausnum á skuldavanda heimilanna.
• Þar sem atvinnumissir er orðið stórt vandamál er það ekki síður brýnt verkefni utanþingsstjórnarinnar að vinna að uppbyggingu atvinnuveganna á skynsaman og raunhæfan hátt um allt land.
• Gagnger endurskoðun á efnahagsstefnu landsins. Þ.m.t. samstarfið við Alþjóðagjaldeyrissjóðinn.

Þetta yrðu verkefni utanþingsstjórnar, auk daglegs reksturs ríkisins.  Í þessum málum hefur stjórnin vissulega brugðist og engar líkur á að það breytist!