3.10.2008. Sjálfur Davíð(!) sagði, að auðvitað væru innistæður í íslenska bankakerfinu tryggðar!

 

Sjálfstæðismenn tala þvert á orð sín og gjörðir 3.10.2008 og 11.10.2008.

 

Hér eru tvær fréttir af mbl.is og svo ein bloggfærsla Björns Bjarnasonar, allt dagsett 11.10.2008, sem sýna að allt tal Davíðs Oddssonar og Geirs H. Haarde er ómerkilegt pólitískt útspil til þess eins að skapa sundrungu með þjóðarinni.  Einsog þessir tveir menn hafi ekki nóg á samviskunni.  Svo að síðustu er svo rúsínan í pylsuendanum,  þar sem sjálfur Davíð(!)segir, að auðvitað væru innistæður í íslenska bankakerfinu tryggðar!

 

 

mbl.is | 11.10.2008 | 15:47

Samkomulag náðist við Holland

 

Hollensk og íslensk stjórnvöld hafa náð samkomulagi um lausn mála hollenskra eigenda innstæðna á IceSave-reikningum Landsbankans.
Fjármálaráðherra Hollands, Wouter J. Bos, og fjármálaráðherra Íslands, Árni M. Mathiesen, tilkynntu þetta í dag en þeir eru báðir staddir í Washington.

Í tilkynningu frá  forsætisráðuneytinu segir að  ráðherrarnir fagni því að lausn hafi fundist á málinu. Wouter J. Bos segist einkum ánægður með að staða hollenskra innstæðueigenda væri nú skýr.Árni M. Mathiesen bætti við að aðalatriðið væri að málið væri nú leyst.

Samkomulagið kveður á um að íslenska ríkið muni bæta hverjum og einum hollenskum innstæðueiganda innstæður að hámarksfjárhæð 20.887 evrur. Hollenska ríkisstjórnin mun veita Íslandi lán til að standa undir þessum greiðslum og hollenski seðlabankinn mun annast afgreiðslu krafna innstæðueigendanna.

 

 

Breskir og íslenskir embættismenn heilsast fyrir fundinn í morgun. mbl.is/Kristinn

Innlent | mbl.is | 11.10.2008 | 08:52

Viðræður hafnar við sendinefnd Breta í Reykjavík

 

Sendinefnd breska fjármálaráðuneytisins og Englandsbanka ræðir við íslenska embættismenn og bankamenn í Reykjavík í dag til að reyna að vernda innistæður Breta í íslenskum útrásarbönkum. Breskir fjölmiðlar segja að mjög mikið sé í húfi fyrir Breta því hætta sé á að mörg góðgerðasamtök, sjúkrahús, háskólar og sveitarfélög tapi miklu fé.

Breska dagblaðið The Times segir að ef allt fari á versta veg kunni bresk góðgerðafélög að tapa alls milljarði sterlingspunda á falli íslensku bankanna. Breska ríkisútvarpið sagði að krabbameinssjúkrahús í Manchester kynni að tapa 7,5 milljónum punda, þar af 6,5 milljónum af gjafafé frá almenningi og fyrirtækjum. The Daily Telegraph segir að nokkrir háskólar hafi átt innistæður í íslenskum útrásarbönkum og tap þeirra gæti numið hundruðum milljóna punda. Þá hafi kattaverndarfélag átt 11,2 milljóna punda innistæðu í einum bankanna.

Breska ríkisútvarpið segir að alls nemi innistæður breskra sveitarfélaga rúmum 840 milljónum punda.

Í bresku sendinefndinni eru lögfræðingar frá fjármálaráðuneytinu, auk fulltrúa Englandsbanka og breska fjármálaráðuneytisins.

----------------

Björn Bjarnason skrifar: 

11.10.2008

Laugardagur, 11. 10. 08.

Flokksráðs- og formannafundur Sjálfstæðisflokksins var haldinn í dag og að honum loknum hittist þingflokkur sjálfstæðismanna í Valhöll. Hér segi ég frá fundinum.

Nú skiptir mestu fyrir okkur Íslendinga, að vel sé haldið utan um eignir bankanna í höndum ríkisins. Ekki síst er mikið í húfi varðandi innlánsreikninga í IceSave í Bretlandi og Hollandi og skuldbindingar íslenska ríkisins vegna þeirra - þær munu ráðast af því, hve þungt þessi byrði leggst á okkur íslenska skattgreiðendur.

Í BBCheimssjónvarpinu var önnur frétt í kvöld, að Sir Philip Green væri að sækjast eftir eignum Baugs. Fréttamaður BBCstaddur í Reykjavík sagði, að fyrir menn með góð fjárráð væri unnt að gera góð kaup á Íslandi um þessar mundir. Birt var mynd af Jóni Ásgeiri Jóhannessyni í Baugi og síðan listi yfir eignir Baugs í Bretlandi, sem vektu áhuga manna á borð við Sir Philip (sem var einhvers staðar kallaður Sir Green í íslenskum fjölmiðli).

BBCsagði einnig frá viðræðum íslenskra og breskra embættismanna um, hvernig ætti að leysa deiluna um IceSave reikningana í Bretlandi. 

 

Davíð Oddsson, seðlabankastjóri.

Viðskipti | mbl.is | 3.10.2008 | 12:33

Davíð: Menn tali varlega

Davíð Oddsson, seðlabankastjóri, sagði í fréttum Útvarpsins, að mikilvægt væri að menn töluðu varlega um efnahagsástandið vegna þess hve allt væri kvikt bæði hér og annarstaðar. Afar þýðingarmikið sé að menn, sem teknir séu alvarlega vegna fræðaþekkingar sinnar, tali eins varlega og þeir geti án þess að tala sér þvert um hug.  Heilu hagkerfin hristust ef rangar fréttir bærust.

Davíð sagði að þrengingar væru gjaldeyrismarkaði en vonir stæðu til að úr þeim þrengingum dragi þegar frá liði. Búast mætti við að sá markaður verði höktandi en hann væri opinn.

Davíð sagði að mikil tortryggni væri í kerfinu og ef greiðslur milli banka tefðust byrjaði kerfið að hiksta. Hann sagði að auðvitað væri innistæður í íslenska bankakerfið tryggðar og mikilvægt væri að menn héldu ró sinni, stæðu saman.  Ekki stæði hins vegar til að koma með neinar yfirlýsingar nema beinharðar staðreyndir lægju að baki. 

Þá sagði Davíð  hér á landi væri einhver mesti  gjaldeyrisforði sem nokkur þjóð búi yfir. Starfað hafi verið eftir þeirri reglu lengi að eiga fyrir 3 mánaða innflutningi án þess að fá nokkrar nýjar tekjur á móti.  Nú sé til gjaldeyrir fyrir innkaupum í 8-9 mánuði án þess að nokkrar nýjar tekjur séu til staðar. Seðlabankinn geti því tryggt allar þarfir ríkissjóðs og allan innflutning sem þurfi án þess að nokkur útflutningur komi á móti í 9 mánuði samfellt. Allt tal um þurrð sé því ofmælt.

 

 

Geir Haarde: Hann tók því illa

Athugasemdir

[Árni Gunnarsson, 4.7.2009 kl. 23:39]

Mér finnst barasta reglulega ljótt af þér Auðun að birta þennan fjanda akkúrat á sama tíma og sjallarnir eru að að lofsama Davíð fyrir einurð hans, framsýni og pólitískan heiðarleika. Fólk á að fá að eiga sína barnatrú í friði eins og við vitum.

Og svo má nú oft satt kjurt liggja!

[Auðun Gíslason, 5.7.2009 kl. 01:16]

Satt eða ósatt?  En það verður ekki uppá þá logið!  Agnes Bragadóttir hvað.  Hún spyr ekki hversvegna DODO ástmaður hennar stoppaði Landsbankann ekki af!