Hagar, Bónus og hin svokallaða frjálsa samkeppni. Lögin eða tilfinningarnar?

Í dag, og undanfarna daga, hafa menn verið iðnir að tjá sig um orðróm.  Sá orðrómur gengur útá að verið sé að afskrifa skuldir ákveðins fyrirtækis. Miklar tilfinningar blandast inní þessa umræðu alla. Þar sem þetta er fyrirtæki svokallaðra Bónusfeðga, og að Jón Ásgeir er einn af útrásar"bófunum", þá fer umræðan svolítið í þennan farveg.  Ýmsir hafa hneykslast á að ekki sé gengið að öðrum eignum manna. Og jafnvel talið að þeir eigi ekki að koma að stjórn fyrirtækisins. 

Það er tvennt sem ekki hefur verið minnst á.  Þegar verið er að greiða úr rekstrar- og skuldavanda fyrirtækja er það tvennt og aðeins þetta tvennt, sem hafa þarf að leiðarljósi.  Það eru lögin og viðskiptalegir hagsmunir.  Hverjir eru eigendur fyrirtækjanna er málinu óviðkomandi.  Ef lög heimila ekki, að gengið sé að öðrum fyrirtækjum eða eignum manna vegna rekstrarvandræða í viðkomandi fyrirtæki, þá er það væntanlega ekki gert. Þetta eru ekki tilfinningamál!

Samkeppni.  Hefur enginn velt því fyrir sér hversvegna Bónusfeðgar hafa náð svo miklum árangri, og mikill markaðsaðild?  Halda menn að það sé aðeins með bolabrögðum?  Hefur þeim bara ekki gengið betur að laða viðskiptavini að verslunum sínum en samkeppnisaðilunum?  Er það ekki það sem hin svokallaða frjálsa samkeppni, hinn frjálsi markaður, gengur útá?  Er þá nokkuð að?

Menn eru að sönnu ekki sammálu um hve mikil markaðshlutdeild umræddra fyrirtækja er.  Samkeppnistofnun, skilst mér, fann út að hún væri í kringum 50%.  Eigendur hafa haldið þessari tölu fram.  Þeir sem, af einhverjum óútskýrðum ástæðum, hafa óbeit á Bónusfeðgum, og öllum þeirra fyrirtækjum og rekstri, halda fram miklu hærri tölu.  Mér er tjáð að hér sé ástandið svipað og í borgum með svipaðan íbúafjölda og býr á Íslandi.

Mér hefur fundist vera svolítið falskur tónn í gagnrýni margra í umræðunni um aðgerðir stjórnvalda og vinnubrögð banka og annarra stofnana í endurreisn samfélagsins.  Þannig hljóma raddir forystu- og talsmanna þess stjórnmálaflokks, sem ber mesta ábyrgð á ástandinu bæði með gerðum og aðgerðarleysi, bæði falskar og hjáróma.  Sama gildir um stuðningsmenn flokksins.  Þessir sömu hafa ekki haft svo stór orð um vini FLokksins í Landsbankanum.  Ekki hefur heyrst hjá þeim að ganga eigi að t.d. Actavis, og hirða það af eigendum þess vegna Icesave-glæfranna. 

Að lokum vil ég taka fram, að ég er ekki neinn sérstakur velunnari Bónusfeðga, frekar en annarra kapítalista.  En mikið helvíti held ég, að oft hefði verið leiðinlegt við matarborðið hjá mér og fleirum, ef ekki væri fyrir Bónus.  Verðlag var ekki svo glæsilegt hjá þeim, sem réðu hér öllu í matvöruverslun áður en Bónus kom til. 

 

Njóta eigendur Haga trausts?

Athugasemdir

[Kristbjörn Árnason, 2.11.2009 kl. 21:53]

Komum í veg fyrir að Kaupþing gefi Jóns Ásgeiri eftir, tugi milljarða skuldir

• Látum hann ekki komast upp með þessa nýjustu brellu sína við að varpa skuldum sínum yfir á almenning í landinu. Enn eina ferðina.  Við erum búin að fá nóg af þessum víkingum

• Nú er tækifæri fyrir almenning að sameinast um það  að koma í veg fyrir, að Jón Ásgeir og hans lið fái niðurfelldar milljarða skuldir og fái þannig haldið þessari verslunarkeðju. Þarna er tækifæri bloggara á öllum bloggmiðlum að mótmæla.

• http://www.mbl.is/mm/frettir/sjonvarp/index.html?media_id=37105

• Að skrifa gegn þessum gjörningi rétt eins og þegar við komum í veg fyrir að Björgólfur og hans lið fékk niðurfelldar skuldir við bankann. Sem þó voru langtum minni en þessi skuld.

• Það á að gera kröfur um að þetta fyrirtæki greiði þessa skuld að fullu strax , ef ekki   þá verði gengið að fyrirtækinu og það sett í gjaldþrot.

• Tækifærið notað til að skipta upp þessari verslunarkeðju sem hefur einokað hér smásölu markaðinn  í átatugi og ráðið hér verðlagi. Verslanirnar verði síðan seldar hæstbjóðendum.  Um annað verður ekki sátt. Keðja sem hefur í raun arðrænt íslenska neytendur.

• Reynslan í vetur segir okkur, að það er ekkert vandamál að gera áhlaup á bankann með því einu að millifæra milli banka. Kaupþing banki gafst  upp í vetur sem leið og hann gera það aftur nú.

• http://www.mbl.is/mm/frettir/sjonvarp/index.html?media_id=37104

Tugmilljarða afskriftir?

[Auðun Gíslason, 2.11.2009 kl. 21:57]

Hvað með aðra?

[Sigurbjörg Jónsdóttir (IP-tala skráð) 2.11.2009 kl. 23:54]

Sammála við eigum að hunsa KB banka leggja allt inn á MP banka.Það er greinilega verið að reina bjarga þeim, gjaldeyris höftin að opnast nú geta þeir komið með fjármagnið inn í landið sem þeir stálu, borgað af skuldum sínum þó ekki allt því þeir verða búnir að fá niðurfella milljarðar skuldir viðbjóður.

[Árni Gunnarsson, 3.11.2009 kl. 20:17]

Ég er andvígur því að láta Bónus verða blóraböggulinn í hruninu mikla. Ein lög í þessu landi!

[Auðun Gíslason, 4.11.2009 kl. 20:10]

Varðandi MPbanka, þá vil ég benda á að MP rekur bankaútibú í Eystrasaltsríki, sem er ekki mjög traustvekjandi!  Grunsamlegast varðandi KP eru þessir 500 milljarðar, sem þeir fengu hjá Seðlabankanum rétt fyrir hrun.  Obbinn af peningunum virðist hafa horfið "sporlaust".  Þar við bætast 300 milljarðar sem Seðlabankinn "lánaði" bönkunum gegn veðum í bönkunum sjálfum!  Samtals 800 milljarðar.  Hver var yfirbankastjóri í SÍ?  Sjálfur Davíð!  Við þetta má svo bæta 200 milljörðum sem Árni Matt, Geir H. og Davíð settu í peningabréfssjóðina.  Samtals 1000.000.000.000 ísl krónur!  1000 milljarðar!  Icesave hvað?

[Árni Gunnarsson, 5.11.2009 kl. 12:04]

Meðan viðhorf fólks til fyrirtækja beinist að eigendum þeirra og afstaðan er á flokkspólitískum grunni verður umræðan ævinlega heldur grunn og lítils virði. Þegar kaupfélögin voru stofnuð á sínum tíma ærðust íhaldsmenn. Þegar vökulögin á togurunum voru sett ærðust íhaldsmenn. Þegar Davíð Oddsson skar upp herör gegn Bónusfeðgum gleymdu íhaldsmenn að tala um "frjálsa samkeppni á markaði."