Ríkisstarfmaðurinn Guðbjörn Guðbjörnsson!

Einkennilegt, hvað mörgum ríkisstarfsmönnum er illa við vinnuveitanda sinn og launagreiðenda.  Nú er Guðbjörn Guðbjörnsson, ríkisstarfsmaður, Sjálfstæðismaður, framboðskandidat, óperusöngvari, kennari, stjórnsýslufræðingur og fyrrverandi námsmaður í Austur-Þyskalandi (ég kann ekki við að segja það nema innan sviga og með spurningamerki: launþegi Stasi?) kominn með Sovét-Ísland á  heilann.  Og verra getur það varla orðið, nema kannski að vera fall-kandidat úr prófkjöri Sjálfstæðisflokksins.  Ég veit svo sem ekki, hvort hann var að stúdera söng eða stjórnsýslufræði.  En hafi hann lært stjórnsýslufræði í paradísinni, skýrir það kannski hversvegna hann starfar ekki sem slíkur.  Hann er nefnilega tollvörður, einsog Adam sálugi Smith, hálfguð hægrimanna.   Vandamálið sem Guðbjörn berst við þessa dagana er að hann telur sig vera orðinn launþega Sovét-Lýðveldisins Íslands (eftir fall ríkisstjórnar Geirs Haarde).  Hann segir að hér hafi verið gerð bylting.  Og ég sem hélt að hér hefðu farið fram frjálsar og lýðræðislegar kosningar.  Og stjórnarskipti verið í landinu í kjölfarið.  Þetta hlýtur að vera óþolandi ástand fyrir Guðbjörn, sem telur sig hafa það fram yfir flest okkar að hafa dvalist í Austur-Þýskalandi??? 

Hvað er nú til ráða fyrir Guðbjörn Guðbjörnsson?  a)  Skipta um vinnu?  b)  Flýja land?

Í framhald þessarar færslu má svo lesa hér neðar um "Báknið Burt."

Athugasemd.  Sett inn eftir að Guðbjörn Guðbjörnsson hótaði að ráðfæra sig við lögmann um lögsókn á hendur mér:

Það skal tekið fram, að Guðbjörn Guðbjörnsson var EKKI á launaskrá Stasi, eða launþegi Stasi, einsog það var orðað í gríninu.  (Ekki frekar en Svavar Gestsson, Hjörleifur Guttormsson og fleiri íslenskir námsmenn í paradísinni).  Heimild: Guðbjörn Guðbjörnsson.  Hér er sem sagt í lagi að setja ríkisstjórn Íslands í sama sæti og ríkisstjórn Austur-þýskalands.  Og að núverandi ríkisstjórn hafi komist til valda með byltingu, en ekki eftir löglegum leiðum.  Að hér sé búið að koma á samskonar ríkisvaldi og var við lýði í Alþýðulýðveldinu Austur-Þýskalandi.  Og gefið í skyn að ríkisstjórn Jóhönnu Sigurðardóttur sé samkonar harðstjórn og ríkti í Austur-Þýskalandi.  Mannorð Guðbjörns Guðbjörnssonar er sem sagt æðra mannorði núverandi ráðamanna á Íslandi!  Miðað við viðbrögð GG. og skrif hans um ríkisstjórnina!

Athugasemdir

[Guðbjörn Guðbjörnsson, 20.6.2009 kl. 21:44]

Auðun:

Hér er um ósæmilega bloggfærslu að ræða, þar sem ýjað er að því að ég hafi verið á mála hjá Leynilögreglu Þýska alþýðulýðveldisins (þ. Ministerium für Staatssicherheit), sem var alræmd fyrir gjörðir sínar.

Öðrum aðdróttunum en að ofan getur er hægt að taka til sín án þess að eftirmáli verði af því, enda eru þær að mínu mati meinlausar og lýsa aðeins innræti bloggarans. 

Það tilkynnist yður hins vegar með, að ég mun ekki aðeins tilkynna færsluna til mbl.is, heldur ráðfæra mig við lögmann minn varðandi hugsanlega málssókn gegn yður.

Virðingarfyllst, 

[Auðun Gíslason, 20.6.2009 kl. 21:52]

Guðbjörn:  Þetta var nú sett inn sem grín og með feitletruðu spurningarmerki! En samkvæmt fréttaflutningi hægri-pressunnar var meirihluti íbúa og erlendra stúdenta (sérstaklega eftirsóttir) á skrá hjá þeim sem slíkir!  En vesgú!  Sjaldséðir hvítir hrafnar!  Það var hefð hér Íslandi að ýja að því að Íslendingar við nám í Austur-Þýskalandi hefðu verið Stasi-þrælar.  Má þar nefna Hjörleif Guttormsson,  Svavar Gestsson o.fl.  En kannski má bara grínast með þetta um menn á vinstri kantinum?

[Guðbjörn Guðbjörnsson, 20.6.2009 kl. 22:00]

Auðun:

Þetta er einmitt málið.

Um mig og kærustu mína var njósnað á meðan á námi mínu í óperusöng í Austurþýska alþýðulýðveldinu stóð. Bæði lentum við í yfirheyrslum hjá þeirri stofnun og kærastan mín kom grátandi frá hverri yfirheyrslu. Slíkir stjórnarhættir eru nefnilega ekkert grín fyrir þá, sem hafa lent í slíkri útreið!

Munurinn á mér, Hjörleifi og Svavari og fleirum, sem þarna voru við nám, er að ég er ekki kommúnisti og hef aldrei verið það. Af þeim sökum fékk ég ekki "special treatment", heldur fór í gegnum helvíti í þessu landi! 

[Auðun Gíslason, 20.6.2009 kl. 22:17]

Hvern fjandann varstu að flækjast sjálfviljugur í helvíti!  Og þú hlýtur að kannast við, hvernig var skrifað um ýmsa Íslendinga, sem stunduðu nám í Austur-Þýskalandi.  Stjórnmálaskoðanir þeirra eru í raun málinu óviðkomandi.  Heldur þú að það hafi verið sérstaklega skemmtilegt fyrir þá að vera úthrópaðir njósnarar fyrir austurblokkina hér á landi, eða fyrir fjölskyldur þeirra og ættingja?  Eða verið þeim til framdráttar í lífinu, allt það níð, sem skellt var á þá.  Án nokkurs tilefnis, annars en að þeir höfðu aðrar stjórnmálaskoðanir en t.d. Morgunblaðið!

[Guðbjörn Guðbjörnsson, 20.6.2009 kl. 22:21]

Auðun:

Í Austur-Þýskalandi fann ég þann söngkennara sem ég vildi fara til og fyrir listina gerir ungur og ákafur listamaður allt.

Síðan kynntis ég þessari stelpu og þá ...

Ég veit ekki hvað Hjörleifur og Svavar voru að gera þarna, en þeir voru ekki í söngnámi eða Biblíuskóla! 

[Auðun Gíslason, 20.6.2009 kl. 22:36]

Sæll Guðbjörn!  "...en ekki voru þeir í söngnámi eða Biblíuskóla."   Ertu þá að gefa í skyn að það sem þeir voru að gera þoli ekki dagsljósið?  Ég hélt að Hjörleifur hefði verið í námi þar í einhverskonar náttúrufræðinámi.  Hann er jú jarðfræðingur!  Ekki veit ég hvað Svavar stúderaði, en eitthvað var það.  Og þú gerir væntanlega grein fyrir, að þú varst ekki eini íslenski námsmaðurinn sem njósnað var um.  Menn voru stundum að grínast með þetta á mannamótum.  Einhver eftirminnileg kynni sín af spæjurum ofurvaldsins í paradísinni, og atvik.  En til að vera spyrtir við austurblokkina þurftu menn ekki hafa komið austur fyrir tjald.  Menn voru úthrópaðir útsendarar austirblokkarinnar, njósnarar, handbendi, fimmta herdeild hennar aðeins fyrir skoðanir sínar.  Og fengu aldeilis að kenna á því aðeins fyrir skoðanir sínar.  Fengu ekki vinnu, stöður, fyrirgreiðslu o.s.frv.  Og ekki voru það vinstrimenn sem stóðu fyrir því!

[Guðbjörn Guðbjörnsson, 20.6.2009 kl. 23:04]

Auðun:

Ég veit ekki hver fjölskyldusaga þín er, en mín einkennist af ofsóknum af því að mitt fólk var upp til hópa sósíalistar eða kommúnistar.

Faðir minn varð ekki skipstjóri hjá Einari ríka Sigurðssyni, sem er faðir "sósíaldemókratans" Ágústar Einarssonar prófessors og eins aðaleiganda Granda hf af því að hann var meðlimur í Sósíalistaflokki Íslands. Faðir minn gerðist síðan skipstjóri hjá Bæjarútgerð Reykjavíkur og víðar og var einn aflasælasti skipstjóri landsins. Það er kaldhæðni örlaganna fyrir mig persónulega að þessi tvö fyrirtæki skyldu síðan sameinast.

Bróðir hans, dr. Ólafur Jensson, yfirlæknir, yfirmaður Blóðbankans og kennari við læknadeild H.Í., sem einnig var sósíalisti, fékk ekki vinnu hjá ríkinu um árabil, þrátt fyrir að vera afburðalæknir og með yfirburðamenntun á sviði blóðrannsókna.

Sími afa míns, sem var sjálfstæðismaður og hét Jens Hallgrímsson - og reyndar allrar fjölskyldunnar - var hleraður í Kalda stríðinu vegna tengsla Ólafs við Sósíalistaflokkinn og afstöðu hans til NATO, en um þetta má t.d. lesa í bókinni Óvinir ríkisins eftir Guðna Th. Jóhannesson.

Ég held að þú ættir að kafa dýpra áður en þú bloggar opinberlega um fólk á netinu. Ég er mjög vel að mér um Kalda stríðið, ofsóknir gagnvart vinstri mönnum, sem voru að sjálfsögðu ýktar og í engu samræmi við hættuna sem af þeim stafaði, en það gátu menn ekki vitað nákvæmlega þessum tíma, þegar hvert landið af fætur öðru var kommúnismanum að bráð. Hættan af alræði - hvort sem það er til vinstri eða hægri - er alltaf fyrir hendi og lýðræðissinnar verða sífellt að vera á varðbergi!

Netið er fjölmiðill líkt og dagblöð, tímarit, útvarp eða sjónvarp og maður ber fulla ábyrgð á því sem maður setur þar fram! Netið er meira að segja að því leiti enn verra að það er aðgengilegt um allan heim, allsstaðar alltaf!

Frelsi - einnig ritfrelsi - fylgir ábyrgð!

[Auðun Gíslason, 20.6.2009 kl. 23:18]

Þú þarft nú ekki að tala af neinu yfirlæti eða vitna eitthvað sérstaklega til Kalda stríðsins, eða þekkingu þín á því.  "að sjálfsögðu ýktar og í engu samræmi við hættuna sem af þeim stafaði."   Hægrimenn á Íslandi virðast annaðhvort illa haldnir af aðsóknarkennd þegar kemur að vinstrimönnum eða uppfullir af einhverjum sérkennilegum humor í þeirra garða! Ekki veit ég hvort þú ert að tala í alvöru þegar þú talar um að hætta hafi stafað af  vinstrimönnum á Íslandi.  En gott þetta sem þú segir um alræðið!  Við höfum nefnilega búið hér við alræði auðvalds og hægri manna undanfarið!  Og undurfurðulegt andrúmsloft hræðslu og hótana!

 Þetta er nákvæmlega það sem ég hefði viljað sagt hafa eftir lestur færslu þinnar um Sovét-Ísland:  Frelsi-einnig rritfrelsi-fylgir ábyrgð!

[Guðbjörn Guðbjörnsson, 20.6.2009 kl. 23:35]

Auðun:

Ef þú hefði fylgst með mínu bloggi undanfarna mánuði - að ég tali nú ekki um orð mín á fundum Sjálfstæðisflokksins undanfarin ár, sem hafði að sjálfsögðu ekki tækifæri til - væri þér ljóst að ég hef ekki verið þægasti sauðurinn í hjörðinni.

Ég var einn sá fyrsti innan Sjálfstæðisflokksins - og fyrsti og lengi vel eini sjálfstæðismaðurinn á blogginu - sem tók undir kröfu almennings um að Davíð Oddsson ætti að víkja sem seðlabankastjóri, enda ábyrgð hans í bankahruninu mikil. Að sama skapi studdi ég frá byrjun kröfuna um að Jónas Fr. Jónsson viki sem forstjóri Fjármálaeftirlitsins. Strax í nóvember bloggaði ég um nauðsyn þess að Geir. H. Haarde viki sem formaður flokksins of sem forsætisráðherra við mjög litlar vinsældir samflokksmanna minna. Að auki hef ég um 2-3 ára skeið aðhyllst aðildarviðræður Íslands við ESB.

Ég er samt sem áður púra hægri maður, sem aðhyllist blandað hagkerfi, þótt ég sé ekki frjálshyggjumaður. Flokkur, sem lengi vel var á bilinu 35-40% hefur innanborðs fólk með ólíkar áherslu og enn sem komið er finnst ég mér eiga heima þar, þótt vissulega hafi ég verið ósáttur um árabil.

Pistill minn "Sovét-Ísland" var satírískur pistill og hann var t.d. skrifaður áður en "Bankasýsla ríkisins" var kynnt til sögunnar, sem staðfestir að mínu mati aðeins á hvaða vegleið við erum, þ.e.a.s. í burtu frá kapítalísku, blönduðu hagkerfi í átt til einhvers óskapnaðar, sem hugnast mér alls ekki! 

[Auðun Gíslason, 21.6.2009 kl. 00:01]

En á ekki Bsnkasýslan einmitt að undirbúa einkavæðingu bankanna?  Og hvað varða DO, þá var hann að mínu mati, og margra annarra, löngu orðinn uppfullur af ofríkistilburðum löngu áður en hann var'ð stjóri í SÍ!  Dæmið um niðurlagningu Þjóðhagsstofnunar segir sína sögu!  Ég get bara ekki séð að þú eigir heima í Sjálfstæðisflokknum, einsog þú lýsir skoðunumsínum.  Hann hefur fyrir löngu snúið baki við hugmyndinni um blandað hagkerfi öfugt við alla aðra stjórnmálaflokka á Íslandi!

[Auðun Gíslason, 22.6.2009 kl. 22:39]

Jæja, finnst þér?

[Guðmundur Ásgeirsson, 23.6.2009 kl. 19:03]

Ef þessar vangaveltur um hugsanleg störf þessa Guðbjörns eru bara út í bláinn, afhverju er þá maðurinn að hóta lögfræðiofsóknum á móti? Bendir það ekki bara til þess að hann hafi eitthvað að verja sem ekki þolir dagsins ljós? En kannski er hann bara svona obboslega viðkæmur greyi drákurinn...

[Auðun Gíslason, 23.6.2009 kl. 19:34]

Já, hann er eitthvað viðkvæmur.  Reynslan sem hann lýsir af viðskiptum sínum við lögregluna austur þar er eflaust óskemmtileg og getur sett ör á sálina, gamanlaust!  En það vefst ekki fyrir honum að gefa í skyn að aðrir hafi eitthvað óhreint í pokahorninu, sbr. "ekki voru þeir í söngnámi eða í Biblíuskóla."  Um Svavar Gestsson og Hjörleif Guttormsson, og ekki eru þeir til svara á blogginu!

[Guðmundur Ásgeirsson, 24.6.2009 kl. 11:28]

"Ég var einn sá fyrsti innan Sjálfstæðisflokksins - og fyrsti og lengi vel eini sjálfstæðismaðurinn á blogginu - sem tók undir kröfu almennings um að Davíð Oddsson ætti að víkja sem seðlabankastjóri, enda ábyrgð hans í bankahruninu mikil. Að sama skapi studdi ég frá byrjun kröfuna um að Jónas Fr. Jónsson viki sem forstjóri Fjármálaeftirlitsins. Strax í nóvember bloggaði ég um nauðsyn þess að Geir. H. Haarde viki sem formaður flokksins og sem forsætisráðherra..."

Guðbjörn hefur augljóslega aldrei lesið bloggið mitt, annars myndi hann vita að hann var ekki einn um þessa skoðun meðal okkar hægrimanna og sjálfstæðismanna núverandi eða fyrrverandi. Ekki skil ég hvers vegna hann reynir að eigna sér "heiðurinn" af því að vera óþægur sauður þegar hann fylgir samt ennþá hjörðinni. Sjálfur mætti ég á mótmælafund við Seðlabankann í október, þann fyrsta sem boðað var til vegna bankahrunsins, og í fréttatíma Stöðvar 2 sama kvöld mátti sjá mig í viðtali haldandi á blaði til staðfestingar úrsögn minni úr SjálfstæðisFLokknum. Svo var ég duglegur að mæta á mótmælafundi í vetur til að krefjast afsagnar þessara manna, og hef bloggað um þá harða gagnrýni oft og mörgum sinnum, ekki síst Jónas Fr. og Geir. Ætli Guðbjörn hafi mætt á einhverja mótmælafundi til að fylgja eftir slíkri skoðun?

[Auðun Gíslason, 24.6.2009 kl. 13:14]

Guðbjörn virðist reyna slá sig til riddara á ýmsum sviðum.  En hann er flókinn og að því er virðist svolítið klofinn karakter.  Að Guðbjörn hafi mætt á mótmæli þykir mér ólíklegt, enda fer ekki saman að telja sig tilheyra yfirstéttinni og standa í mótmælum!